Ek Student Ko Kaise Jeena Chaiye [Make Student’s Life Easy with 9 Awesome Tips]

Please follow and like us:

Aaj ki yeh zindagi bilkul aasan nahi hoti aur student life to bilkul bhi nahi. Humari is zindagi ki kahani me kafi kisse aate hai, kuch humare bachpan ke, kuch humare carrier ke to kuch humari zindagi ke humsafar ke par humari is kahani me ek kissa aisa hai jo kabhi bhi khatam nahi hota, aur wo hai “Student Life” ka. Jaise ek student apne teacher se gyaan(Knowledge) ko pal-pal hasil karta hai vaise hi humari zindagi bhi to humari guru ban kar humari zindagi ke har mod par kuch naya sikhati hai, par kabhi-kabhi kuch students apni is student life ko sahi tarah se manage hi nahi karte kyuki unhe pta hi nahi ki woh itna sara kaam kare to kare kaise! Aaj hum aapki isi problem ko solve karne ka sabse best or amazing tareeka batane waale hai aur har student life ko easy karne waale hai.

Student Life Ko Sabse Ache Or Easy Style Se Jeene Ka Best Way:

Sabse pehle to dosto yeh jaan lijiye ki student life kabhi bhi aasan nahi hoti. Agar yeh itna hi aasan hota to aaj har ek student apni life ko ek mukable, ek race ki tarah nahi dekhta. Aaj ki is zindagi me har koi ek dusre se aage nikalne me lga hai par is race me achanak ek din ye realize hota hai ki naa jaane kab humari yeh student life humare hath se rait(Sand) ki tarah guzar si gayi, par dosto, kya aap jante hai ki ye humari zindagi ke wo anmol pal hai jo kabhi laut kar vapis nahi aayenge.

Zindagi Kabhi Aasan Nahi Hoti Janaab!
Yeh Toh Aap Hi Hai Jo Strong Ban Jaate Hai!

Sach to yahi hai dosto ki yeh student life hi aapki zindagi ke aise pal jo aapko sari zindagi yaad rahenge isiliye jaruri hai ki aap apni student life ko sahi aur stress free tareeke se enjoy kare. Kya aapne kabhi socha hai ki Abdul Klam Sahib, P.T. Usha, Aarybhat, Albert Einstein jaisi mahan shaksiyat (Personalities) is mukaam tak pahuchi kaise? Kaise inhone apni zindagi ki un sabhi problems ka saamna karte huye success ko hasil kiya? Dosto, yeh woh personalities hai jinhe apni school life me sahi tarah se padhna tak nahi aata tha par fir bhi inhone apni zindagi se haar na maan kar success ko hasil kiya jiska sabse pehla padaav(level) tha Student life me success hasil karna! Chaliye ab jaante hai ki kaise aap apni is student life ko easily jee sakte hai.

  1. Jilo Zindagi

Humari student life me kafi pal aate hai aur jaruri nahi ki har pal bilkul sahi ho par dosto yeh kafi zaruri hai ki aap har pal ko ache se jiye aur use enjoy kare, fir chahe woh ghar me milni waali daant(Scolding) ho ya koi muskurata pal. Kabhi-kabhi hum sirf daant padne se kafi bura feel karte hai aur khud se hi gussa ho jaate hai par dosto kya aise khud se gussa hokar aapki problem kabhi solve huyi hai? Aap chahe to apni mushkilo se gussa hokar apni zindagi ko jyada mushkil bna sakte hai ya fir unhi mushkilo ko apni motivation bna kar success ke liye aur jyada mehnat kar sakte hai!

Zindagi Ki Rahon Me Kaante Bahut Hote Hai,
Aur Angaaro Par Chalne Waala Hi Baazigar Kehlata Hai!

Kabhi-kabhi hum kisi ek kam ko karne ke liye kisi dusre kaam ko nahi karte par dosto aise apni zindagi ke ek pal jeene ke liye dusre ko chod dena sahi nahi hota. Aap apni zindagi ke har pal ko ache se jeeye or kisi bhi pal ko miss na kare balki apne har kaam ko manage karte huye use enjoy kare. Ek baat jarur yaad rakhe dosto ki jaruri nahi ki agar aaj kisi khel me aapko haar ka samna karna pada hai to kal bhi aapko haar hi milegi kyuki khel to khelne ke liye hota hai isliye us khel ke har pal ko sache dil se enjoy kare.

  1. Explore Yourself

Kabhi-kabhi insaan apni puri zindagi me mostly khud ko hi samajhne me guzaar deta hai par samajh hi nahi pata! But kya aapne kabhi socha aisa hota kyu hai? Kya khud ko samajhna itna mushkil hai? Jaise har cheez ka ek sahi waqt hota hai vaise hi agar aap khud yahi sawaal sahi time par kare toh aapko isaka jawaab jarur milta hai. Student life humari zindagi ki wo stage hai jab hum apni khubiyo(Qualities) ko dhundhte hai ya kahe to unhe banate hai. Woh qualities jo humre career ko humari zindagi ko banane me help karte hai but dosto real qualities kabhi bhi itni aasani se hasil nahi hoti hai. Aisi qualities ko hasil karne ke liye ye jaruri hai ki aap khud se puche ki aap apni zindagi me karna kya chahte hai! Jab tak aap apni zindagi ke maksad(Aim) ko nahi samjhege tab tak aap apni khubiyo or khamiyo ko jaan hi nahi sakege.(Read Now:- Apni Zindagi Ka Aim Select Karne Ka Sabse Aasan Tareeka).

Isliye dosto aaj hi khud ko explore kare jisse aapki zindagi ko ek proper aim mil sake aur aap apni student life aur puri zindagi success ko hasil kar sake. Soch kar dekhiye dosto, agar Sachin Tendulkar ji ne kabhi khud ko explore nahi kiya hota, kabhi apni zindagi ke aim ko samjha hi nahi hota to kya unhe aaj yeh pta chalta ki wo cricket ki duniya ke aise khiladi hai jinhone apne awesome khel se cricket ki history ko hi badal diya! Mujhe pura yakeen hai dosto ki aap bhi apni zindagi ke aim ko aise hi samjhege aur khubiyo aur khamiyo ko ache se jaan kar life me success hasil karege.

  1. Create Your Own Free Time

Har koi kehta hai ki student life hoti to bahut masti vali hai but dosto yeh to aapki zindagi ka wo pal hota hai jab mostly koi bhi students bilkul bhi free nahi rehte, jis wajah se unke bahut se kaam time par ho hi nahi pate hai, aur agar wo kisi bhi tarah woh kaam pura karne ka soche to unhe apna woh free time use karna padta hai jo unhone rest karne ke liye ya kahe to apni zindagi ko enjoy karne ke liye badi hi mushkil se save kiya hota hai. Yeh sach hai ki aapko apna sara kaam time par karna jaruri hai par dosto apni zindagi ko enjoy karna usse bhi jaruri hai kyuki bina life enjoy kiye aapko success nahi sirf stress/tension hi milti hai. To dosto aap hi sochiye ki kya life enjoy karne ke liye apne kaam ko pura na karna sahi hai ya fir kaam ko pura karne ke liye zindagi jeena hi bhula de?

Kyu na ek aisa tareeka dhundhe jisse aap zindagi ko bhi ache se enjoy kar sake or aapka kaam bhi humesha pura rahe! Dosto aapki student life me sirf 2 cheeze hi sabse time consuming hoti hai.

  • 1st, Aapka Homework. Apne homework ko pura rakhne ka sabse acha tareeka hai ki aap apne school time kisi bhi free period me apne homework ko pura karle ya ghar pahuchte hi thoda rest karne ke baad homework full speed ke sath khatam karle. Apne homework ko time par karne ke liye apni writing speed ko jyada se jyada increase kare jisse aapka 2hrs ka kaam sirf 1hrs me hi pura ho jaye, aur yakeen maniye dosto, aap chahe to yeh kar sakte hai!
  • 2nd, Revision. Ab agar baat kare revision ki to uske liye to sirf 2hrs hi kafi hai. Aap humesha raat ko sone se pehle apne din bhar karaye gye kaam ko revise kare aur yaad rahe sirf revise karna hai isliye ek subject ko sirf 10-20min jyada se jyada padhna hai uske baad next subject ko revise karna shurur kar dijiye. Is tarah aapki jyada se jyada revision raat ko hi ho jaayegi ab us revision ko final karne ke liye early morning me fir dobara revise kare par is baar ek subject par 5-10min. Dosto ek baat ka khas dhayan rakhiye ki revision humesha full concentration ke sath kare nahi to aapki revision kabhi bhi properly ho hi nahi sakegi.

But dosto agar aapne properly apne homework or revision ko manage kiya to aapke pass apni zindagi ko enjoy karne ke liye kafi time hoga aur aapke liye aapki student life bahut hi easy or successful ban jayegi.

  1. Schedule Setting

Bahtu se students ke liye jaruri hota hai ki woh ek daily schedule set kare kyuki unhe lagta hai ki ye unke liye sabse acha tareeka hai apni student life ko manage karne ka aur shayad wo sahi bhi hai kyuki dosto aapko aapse better or koi bhi nahi jaan sakta. But dosto kya apne schedule ke according apna saara kaam kar pana kabhi possible ho pata hai? Aisa bahut baat hota hai ki hume apne schedule ko bhula kar koi aur kaam karna padta hai but dosto, schedule set karne ka matlab ye ni ki aap ek limited time me sirf ek hi kaam kare kyuki schedule ka real mean to apne kaam ko decide karna hota hai. Ek student ko din bhar me bahut se kaam karne hote hai isilye sabse acha hoga ki aap apne har kaam ki ek list banaye aur jab bhi aapko time mile aap uss kaam ko puraa karle. Aisa karne se aapki life ekdum tension and stress free ho jayegi aur aapka daily schedule bhi humesha pura raha karega.

  1. Express Your Thoughts

Humari student life me ek pal aisa bhi hota hai jab hum apni soch(Thoughts) ko, apne views ko express hi nahi kar paate kyuki hum darte hai aur darr lage kyu na? Hai to humara dil masoom sa hi! Humara ye masoom dil kafi cheejo se darta hai par apne views express na kar pane ka sabse bada darr hota hai dusro ka reaction. Hum humesha yahi sochte rehte hai ki humare views par dusre kya bolege kahi humari soch unhe pasand nahi aayi to? Kahi unhone humari soch ka majak udaya to? Dosto humare dil ka darr hona normal baat hai par jara khud se puchiye ki kya aapko apni soch par bilkul bhi bharosa(Trust) nahi hai jo aap dusro ke reactions se darr rahe hai! Aapko apni views express karne se kabhi bhi darna nahi chahiye kyuki dosto aapki soch sirf aapke liye matter karti hai. Agar kisi person ko aapki soch pasand nahi aati to isme aapki koi galti nahi aur agar kisi ne aapki hi soch ka majak udaya bhi to jara sochiye ki aapki wajah se koi person khush ho raha hai to kyu na aap khud hi jara muskura de! Dosto kabhi bhi darr se bhagiye mat balki zindagi me apne darr ka samna karte huye jeet ko hasil kare.

Galti Karne Waale Hi,
Ek Din Success Ko Hasil Karte Hai!
Darr Kar Baithe Rehne Waale To,
Sirf Tamasha Dekhte Hai!

  1. Health Is Key To Success

Ek student ke liye yeh kafi jyada jaruri hai ki wo apni health ka pura dhayan rakhe kyuki student life hoti hi itni jyada busy hai ki student ke pass bimaar hone tak ka time nahi hota! Agar student apni health ka dhayan nahi rakhte to success bhi unse door(away) bhagti huyi lagti hai. Aapki health ke liye sabse jaruri hai ki aap humesha healthy food hi khaye aur apni ek proper healthy diet le. Healthy diet ka matlab yeh nahi ki aap kam khaye ya fir apna favourite fast food khana chode de par dosto har cheez ki ek limit hoti hai aur jarurat se jyada kuch bhi kabhi acha nahi hota isliye humesha properly khaye aur apni health ka dhayan rakhe. Apni health ko aur better rakhne ke liye running kare kyuki running karne se aapki body ke sath aapka brain strong banega aur aapko jyada ache se sab yaad rahega aur scientifically proven bhi hai. To dosto, apni health ka dhayan rakhte huye success ko hasil kaijiye.

  1. Better To Be On Your Own

Kabhi-kabhi zindagi me kuch aise bhi pal aate hai jab hum kisi cheez par jarurat se jyada hi nirbhar (depend) rehna shuru kar dete hai. Student life me aksar hum kisi ek hi cheez se apni life ko easy karne ki sochte hai aur bar-bar usi cheez ko use karte hai but dosto zindagi me jab mushkil aati hai tab is duniya me koi bhi aapki help ke liye nahi aata hai kyuki yeh zindagi kisi aur ki nahi sirf or sirf aapki hi hai! Aapki zindagi me kafi log aate hai aur kafi aapki zindagi se chale bhi jaate hai par ek person hai jo aapki zindagi me marte dum tak aapke sath rehta hai aur woh ho aap khud! Dosto khud ko humesha is kaabil banaye ki aap apni zindagi ki kisi bhi mushkil se akele hi deal kar sake. Zindagi me akele kuch karna hi sabse mushkil hota hai par impossible nahi! Aap chahe to akele bahut kuch kar sakte hai bas khud par bharosa kare aur dusro par depend rehna chod kar apni kabiliyat(Qualities) ko pehchane aur yakeen maniye dosto, aapki student life me success aapko apne aap mil jayegi.

  1. Truth of Student Life

Student word ka mean hi hai study, par mostly har ek student ko study karna ek burden lagta isliye wo study se jyada masti karna hi pasand karte hai but kabhi-kabhi wo masti itni jyada ho jaati hai ki students ke marks hi ache nahi aate jiski wajah se unhe kafi problems face karni padti hai! Ye problem hai hi aisi ki iska solution milna jaise impossible hi lagta hai par dosto nothing is impossible! Humesha yaad rakhiye “IMPOSSIBLE = I-M-POSSIBLE”.

Duniya me har mushkil ko dekhne ke 2 najariye(view) hote hai jisme ek hota hai acha or ek hota hai bura. Jaise kabhi-kabhi aap apni pasand ki cheez hasil nahi kar paate aur apni zindagi ko hi koste hai but baad me ek na ek din yahi realize hota hai ki jo huya acha hi huya! Aise hi dosto har cheez ko positive view se dekhe aur agar ek baar number kam aa gye hai to is baar jyada se jyada mehnat karke sabse ache marks le aaye. But abhi bhi sabse mushkil hoga aapko study me mann laga kar padhna, par dosto ek tareeka hai humare pass jisse aapko study karne me motivation jarur milegi aur woh tareeka hai “AIM/REASON”. Zindagi me kuch bhi karne ke liye reason ka hona kafi hi jaruri hai aur aapko bhi study karne ka sirf ek reason dhundhna hai jisse aap humesha mann laga kar study kar sakege aur apni student life ko easily handle kar sakege.

  1. Never Give Up

Ek student ki life me kafi mushkile aati hai jisse tang aakar kabhi-kabhi kuch students haar maan lete hai par dosto student life me sabse jaruri hai ki aap kabhi bhi haar naa mane. Student life ek competition ki tarah hota hai. Ek aisa competition, jisme aap akele khiladi hai jise khud se hi jeetna hai. Aapko hi aapne aaj se jyada mehnat karni hai taki aap kal apni student life me success hasil kar sake. Zindagi me haar jana to sabse aasan hota hai par khud se hi haar maan lene se to zindagi hi bematlab si ban jaati hai isliye chahe galtiya hoti hai to hone dijiye par koshish jarur karte rahiye. Galti karne me koi burayi nahi hai. Ho sakta hai galti karne par aapse sab gussa ho jaye aur aapko daant bhi pade par dosto galti karne waale hi zindagi me ek naye mukaam ko hasil kar paate hai aur vaise bhi dosto, thodi si daant se agar kuch new sikhne ko mile to isme koi burayi nahi! Agar Thomas Alva Edison apni baar-baar ki gyi galtiyo se haar maan lete to aaj humare pass Bulb nahi hote. So dosto humesha yaad rakhe, “No Darr Jiyo Be Fikar”. Apni zindagi me haar se motivation lekar jeet ko hasil kare.

Haari Baazi Ko Jeetna Jise Aata Hai,
Wohi Dosto Sikandar Kehlata Hai!

Dosto, ab aap jaante hai ki aap kaise apni student life ko easy bana sakte hai. To all the best dosto, aise hi masti karte huye apni zindagi me success ke liye mehnat karte rahiye aur jeet ko hasil kare. Agar aap kuch bhi puchna chahte hai ya aap apni kisi bhi problem se realted help chahte hai to aap hume comment karke kuch bhi puch sakte hai ya fir aap hume mail karke apni problem share kar sakte. Hum aapki problem ko jaldi se jaldi solve karne me help karege aur aise hi hume support karte rahiye aur apni zindagi me khushiya bharte rahiye.

Please follow and like us:

8 thoughts on “Ek Student Ko Kaise Jeena Chaiye [Make Student’s Life Easy with 9 Awesome Tips]”

  1. it helped me very much. i was in depression so i searched motivational sites on google then your site pop up. i checked your blogs . they totally motivated me i want your contact no for more inquiry .

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.